श्री स्वामी समर्थ प्रगट दिन उत्साहात साजरा

पालखी सोहळ्यात भाविकांची अलोट गर्दी

हजारो नागरिकांनी घेतला महाप्रसादाचा लाभ

आमचा विदर्भ - अनंता गोखरे कार्यालय प्रतिनिधी

राजुरा (दि. २४ मार्च २०२३) -

        अनन्यभावाने भक्ती करणाऱ्या भक्तांच्या सदैव पाठीशी राहणाऱ्या आणि ''भिऊ नकोस..मी तुझ्या पाठीशी आहे.'' असे अभिवचन देणाऱ्या श्री स्वामी समर्थ महाराजांचा प्रकटदिन मोठ्या उत्साहाने साजरा करण्यात येतो. चैत्र शुद्ध द्वितीया दिनी स्वामी समर्थ महाराज अक्कलकोट येथे दाखल झाले. श्रीपाद वल्लभ व नृसिंहसरस्वती यांच्या नंतरचे भगवान श्रीदत्तात्रेयांचे ते तिसरे पूर्णावतार अवतार आहेत, अशी मान्यता आहे. (Thousands of citizens took advantage of Mahaprasad)

        दरवर्षीप्रमाणे यावर्षीही अक्कलकोट निवासी श्री स्वामी समर्थ महाराजांचा प्रकटदिन पोस्ट ऑफिस जवळील श्री स्वामी समर्थ महाराज गुरुमंदिर (Shri Swami Samarth Maharaj  Gurumandir) येथे गुरुवार दि. २३ मार्च २०२३ ला भव्य दिव्य स्वरूपात साजरा करण्यात आला. श्री स्वामी समर्थ महाराज गुरुमंदिरात नैवेद्य, महानैवेद्य आरती, पालखी सोहळा व महाप्रसादाचे आयोजन करण्यात आले होते. महाराजांची पालखी श्री स्वामी समर्थ महाराज गुरुमंदिर येथून काढण्यात आली होती. पालखी पोस्ट ऑफिस मार्गे राजीव गांधी चौक, डॉ. बाबासाहेब आंबेडकर चौक, नेहरू चौक, गांधी चौक मार्गे काढण्यात आली होती. यामार्गावरील नागरिकांनी घरासमोर रांगोळी, फुलांचा वर्षाव करत पालकीचे स्वागत केले. पालखी सोहळ्यात हजारो भाविकांनी उपस्थिती दर्शवून महाप्रसादाचा लाभ घेतला. (A large crowd of devotees during the palanquin ceremony)

        श्री स्वामी समर्थ महाराज गुरुमंदिरात प्रगटदिन निमित्य आमदार सुभाष धोटे, माजी आमदार अँड. वामनराव चटप, माजी आमदार अँड. संजय धोटे, सुदर्शन निमकर, माजी नगराध्यक्ष अरुण धोटे, माजी नगराध्यक्ष सुनील देशपांडे, माजी नप शिक्षण व क्रीडा सभापती सेठ राधेश्यामजी अडानिया, विनायक देशमुख, तसेच शहर व परिसरातील हजारों नागरिकांनी गुरुमंदिरात उपस्थिती दर्शविली. कार्यक्रमाच्या यशस्वितेकरिता श्री स्वामी समर्थ महाराज गुरुमंदिर उत्सव समितीच्या पदाधिकारी, सदस्य व भक्तपरिवारांनी परिश्रम घेतले.