पुलावरून दुचाकी पडली ; एक मृत एक जखमी

• मृतक राजुरा तालुक्यातील मूर्ती गावाचा

स्वप्नील वाढई - आमचा विदर्भ प्रतिनिधी (ग्रामीण)
राजुरा  -
मानोरा-उमरी रोड वरील पुला वरून जात असतांना दुचाकीवरील नियंत्रण सुटल्याने एकाचा मृत्यू तर एक गंभीर जखमी झाल्याची घटना ५ एप्रिल ला दुपारी ३.०० वाजताच्या सुमारास घडली. मृतकाचे नांव गणेश रमेश मडावी वय 24 असून तो राजुरा तालुक्यातील मूर्ती गावचा रहिवासी होता. चेतन प्रभाकर डाखरे वय 28 हा गंभीर जखमी झाला आहे.

मिळालेल्या माहितीनुसार राजुरा तालुक्यातील मूर्ती येथील मृतक गणेश मडावी व चेतन डाखरे हे घाटकुरला दुचाकी क्रमांक MH 34 AU 3689 ने 

लग्नाकरिता निघाले होते. लग्नाला जात असतांना मानोरा-उमरी रोड वरील पुला वर दुचाकीवरील नियंत्रण सुटल्याने दोघे पुलावरून खाली पडले. त्यात रमेशचा जागीच मृत्यू झाला तर चेतन गंभीर जखमी झाला. चेतनचा चंद्रपुरात दवाखान्यात उपचार सुरु आहे. मनमिळावू स्वभावाचा मृतक गणेश मडावी शेतमजुरी करत होता. आई-बाबाचा एकच अपत्य असल्यामुळे कुटुंबावर तसेच गावात शोककळा पसरली आहे.