जेष्ठ विदर्भवादी नेते अँड. वामनराव चटप यांना दिल्ली येथे भारत ज्योती अवॉर्ड प्रदान

• लढवय्ये, पारदर्शी व चारित्र्यवान व्यक्तिमत्त्व म्हणुन गौरव
• सर्वच स्तरावरून साहेबांचे अभिनंदन......

अनिल गंपावार - आमचा विदर्भ तालुका प्रतिनिधी
राजुरा -
इंडिया इंटरनॅशनल फ्रेंडशिप सोसायटी, नवी दिल्ली द्वारे दिला जाणारा राष्ट्रीय पातळीवरील प्रतिष्ठेचा समजला जाणारा "भारत ज्योती अवॉर्ड" शेतकरी संघटनेचे जेष्ठ नेते माजी आमदार अँड. वामनराव चटप यांना प्रदान करण्यात आला. माजी स्थल सेना उपाध्यक्ष सरदार जगजीतसींग, चेन्नईच्या राज्यसभा खासदार शशिकलापुष्पा रामास्वामी व राष्ट्रीय लोकदलांचे जनरल सेक्रेटरी श्री. त्यागी यांच्या हस्ते भारत ज्योती अँवार्ड व उत्कृष्ट कामगिरी प्रमाणपत्र देण्यात आले. इंडिया इंटरनॅशनल सेंटर, नवी दिल्ली येथे दिनांक 9 एप्रिल 2021 ला झालेल्या कार्यक्रमात अँड. चटप यांना सन्मानित करण्यात आले. 

अँड. वामनराव चटप हे गेल्या चाळीस वर्षापासुन राजकिय, सामाजिक, शेती व वकीली क्षेत्रात कार्यरत असून त्यांना सार्वजनिक क्षेत्रात कार्याचा दांडगा अनुभव आहे. आमदार असतांना उत्कृष्ट संसदपटू पुरस्कार त्यांना मिळाला असून ते शेतकरी संघटनेचे माजी अध्यक्ष तथा विदर्भ राज्य आंदोलन समितीचे अध्यक्ष आहेत. शेतकरी व  कष्टकरी जनतेसाठी तसेच स्वतंत्र विदर्भासाठी आंदोलन करणारे लढवय्ये नेते म्हणुन त्यांची ओळख आहे. नक्षलवादी क्षेत्राचे पंधरा वर्षे आमदार म्हणुन प्रतिनिधित्व करतांना कुठलीही सुरक्षा न घेणारे, सार्वजनिक जीवनात पारदर्शकता व चारित्र्य राखणारे तसेच शेतकर्‍यांना आर्थिक स्वातंत्र्य मिळावे, शेतमालाला रास्त भाव मिळावा आणि तंत्रज्ञान व बाजारपेठेचे स्वातंत्र्य मिळावे, यासाठी चाळीस वर्षापासुन अव्याहतपणे लढा देत आहेत. अँड. चटप हे दारूबंदीचे कट्टर पुरस्कर्ते असून त्यांच्या विविध क्षेत्रातील कार्याची दखल घेऊन आणि जीवनातील पैलूला प्राधान्य देऊन त्यांची या अवॉर्ड साठी निवड करण्यात आली आहे. यापुर्वी महाराष्ट्रातून हा पुरस्कार ख्यातनाम क्रिकेटपटू सुनील गावस्कर आणि शिक्षणमहर्षी व बिहारचे राज्यपाल डी.वाय.पाटील या दोघांनाच मिळाला होता. विदर्भातून हा सन्मान मिळणारे अँड.चटप हे पहिले व्यक्ती आहेत, हे विशेष.

त्यांच्या या यशाबद्दल शेतकरी संघटना, विदर्भ राज्य आंदोलन समिती, स्वतंत्र भारत पक्ष यांच्या कार्यकर्त्यांसह नागरिकांनी त्यांचे अभिनंदन केले आहे.