कोरोनाबाधित महिला जीवंत असताना मृत घोषित करण्याचा संतापजनक प्रकार

• बिलाचे पैसे न देण्यासाठी चुकीच्या अफवा पसरवित असल्याच्या कोव्हिडालयाचा आरोप
• वाचा सविस्तर कुठे घडला हा धक्कादायक प्रकार

आयशा - आमचा विदर्भ कार्यालय प्रतिनिधी

नागपूर -

कोरोनाबाधित महिला रुग्णाला जीवंत असताना मृत घोषित करण्याचा संतापजनक प्रकार वर्धा मार्गावरील डोंगरगावजवळील आयजीपीए हॉस्पिटल अॅण्ड रीसर्च सेंटरच्या कोव्हिडालय येथे शनिवारी घडला. या प्रकारामुळे संतप्त कुटुंबीयांनी हिंगणा पोलिस स्टेशनला तक्रार दिली.

मृत घोषित करण्यात आलेल्या महिलेचे नाव आशा चंद्रभान मून वय ६३, रा. काशीनगर, रामेश्वरी मार्ग असे आहे. आशा मून यांची ९ एप्रिल रोजी रात्री ११.३० वाजताच्या सुमारास प्रकृती खालावली. त्यामुळे तत्काळ त्यांना इस्पितळात दाखल करण्यात आले. त्या इस्पितळात कोव्हिड सेंटर असल्यामुळे रुग्णाजवळ नातेवाईकांना थांबू देण्यात येत नव्हते. दरम्यान, शनिवारी सकाळी ८.३० वाजता आशा यांचा मुलगा अजय याला इस्पितळातून फोन आला. तुमच्याकडील रुग्णाचा मृत्यू झाल्याचे समोरच्या व्यक्तीने सांगितले. ही बातमी ऐकताच अजय आणि काही नातेवाईक इस्पितळात पोहोचले. तिथे त्यांना रुग्णाचे मृत्यू प्रमाणपत्र सोपविण्यात आले. मृतकाची ओळख पटविण्याकरीता शरीरावरील दागिने दाखविण्यात आले. ते पाहताच दागिनी आई आशा यांचे नसल्याचे मुलगा अजयने सांगितले. त्यानुसार अजय यांनी संबंधित डॉक्टरांना मृतकाचा चेहरा दाखविण्याची विनंती केली. मृतकाचा चेहरा पाहताच त्या आशा मून नसल्याचे स्पष्ट झाले. लागलीच कोव्हिड वॉर्डमध्ये जाऊन पाहिले असता आशा मून या जीवंत असल्याचे दिसून आले. हा संपूर्ण प्रकार मून कुटुंबीयांसाठी धक्कादायक आणि तितकाच संतापजनक होता. या प्रकरणी कुटुंबीयांनी पोलिसांत तक्रार देत इस्पितळाच्या हलगर्जीपणाबाबत योग्य कारवाईची मागणी केली आहे. हा संपूर्ण प्रकार झाल्यानंतर मून यांना छत्रपती चौकातील न्युक्लिअस हॉस्पिटलला हलविण्यात आले.

कर्मचाऱ्यांची चूक, बिल न देण्याचा फंडा

इस्पितळातील कर्मचारी वर्गाकडून फाइल आणण्यात चूक झाली. रामटेके यांच्याऐवजी मून यांची फाइल आणून रिसेप्शन काउंटरला ठेवण्यात आली. त्यानुसार मृत्यू प्रमाणपत्र बनवून ठेवले. मात्र, मृत्यू प्रमाणपत्र सुपूर्द करण्यापूर्वी कुटुंबीयांना मृतदेह दाखविण्यात आला. त्यांनी तो मृतदेह त्यांचा नसल्याचे सांगताच झालेली चूक कबूल करून प्रमाणपत्र बदलवून देण्यात आले. यादरम्यान मून यांनी मृत्यू प्रमाणपत्र स्वत:च्या खिशात टाकले आणि गोंधळ घातला. मून यांच्या कुटुंबीयातील नातेवाईक राजकीय पक्षाशी संबंधित असून बिलाचे पैसे न देण्यासाठी चुकीच्या अफवा पसरवित आहेत, अशी माहिती कोव्हिडालयाचे मालक डॉ. मोहन गायकवाड पाटील यांनी दिली.